كملي جمالك بربطة حجابك .. هااااام جدااااااا

احدث اجدد واروع واجمل واشيك كملي جمالك بربطة حجابك .. هااااام جدااااااا

كملي جمالك بربطة حجابك .... هام جدا

إيه هي أحدث خامات الطرح؟

كل فصل من فصول السنة له خامة، يعني في فصل الصيف ممكن نلبس الطرح الأقطان الخفيفة والشيفون..

وفي فصل الشتاء نلبس الطرح القطن الثقيلة شوية وهي موضة جدا السنة دي، أما الأورجانزا والتول

والشيفون فممكن نلبسهم في أي وقت وبيناسبوا أكثر السهرات والسواريه.

أحدث أشكال ونقشات الطرح إيه؟

الألوان المتداخلة مازالت موضة والطرح الكاروه والطرح المنقطة والطرح اللي فيها كور موجودة بكثرةوالطرح المقلمة..

ومعظم الخامات دلوقتي فيها لمعة وممكن نلاقي اللمعة الفضي والذهبي مع بعض، يعني مثلا تلاقي القماش كاروه أحمر

وأسود وفيه لمعة فضي أو ذهبي ولون رصاصي وفيه لمعة فضي، والأشكال المنتشرة الآن الطرح الضخمة زي (الشال).

واللمعة اللي موجودة في الطرح ممكن نلبسها في النهار؟

معظم البنات كانوا متخوفين إنهم يلبسوا الطرح اللي بتلمع في النهار لكن دلوقتي أصبحت موضة جدا.

هل ربطة الطرحة الإسبانش تراجعت شوية؟

أيوه الربطة الإسبانش تراجعت وأصبحت منتشرة حاليا الربطة المنفوشة وخصوصا الطرح الصوف المنقوشة

ونازلة على الظهر كله وجود أكثر من طرحة مع بعض.



وإيه هي أحدث أشكال وأنواع البندانة؟

أولا أنا عايزة أنصح كل البنات بإنهم يلبسوا (البندانة القطن) في الأساس على شعرهم مباشرة لأنها مفيدة وصحية جدا وتمنع تساقط الشعر وتحافظ عليه وكمان بتساعد على وضع الدبابيس كويس ولا تساعد على تزحلق الطرحة...

وعلى فكرة البندانة دلوقتي بقت بديل عن الطرحة، يعني تقدر البنت تضع أكثر من لون للبندانة على إنهم طرح ملونة وتضع في النهاية طرحة واحدة في الواجهة، وفيه أنواع كثيرة من البندانة زي البندانة "الليكرا "- "شيفون"- "التول". وعرضها 10سم وطولها 30 سم وكمان البندانة المستطيلة والبندانة الكاملة على الرأس وممكن البنت تلبسها بطريقة مائلة والعكس


هل ممكن البنت تستخدم الطرحة لإخفاء عيوب الوجه والمناطق الضخمة في وجها؟
آه طبعا.. أكيد..

طيب ازاي؟
شوفي لو مثلا البنت وجهها طويل يبقى تحاول تعمل الطرحة لتحت في اتجاه الخلف أو على جنب، وبعدين تقصر الجبهة وتضيف أي حاجة على الجانب علشان الوجه يبان إنه عريض.
وخلّي بالك إن الوجه الطويل لا يتناسب معاه الربطة العالية لأنها هتطوّل الوجه أكثر.

طيب لو بنت وجهها مدوّر؟
يبقى بلاش تلف الطرح على جنب إطلاقا لأنها تزيد من مساحة (الخدود) وتعمل الطرحة للخلف، لتحت أو لفوق، وممكن تعمل الطرحة شينوه لفوق، وممكن تعمل الربطة ديل حصان لفوق عشان الوش يكون رفيع.

والوجه المربع أو المستطيل؟
الوجه المربع والمستطيل بيكون عنده أربع بذور، اثنتين في الجبهة واثنتين في الفكين وعلشان كده لازم تنزل بالطرحة لتحت شوية ونعمل (كروس) طرحة عكس الثانية والطرحة بتساعد إن الوش يكون رفيع وتحاول تداري الجبهة وتحاول تنزل بالطرحة على الجبهة وتقفل الجبهة.

والوجه البيضاوي؟
معظم الربطات تمشي معاه وممكن تعمل ربطة على جنب أو تقفل من قدام أو تعمل كروس.

طيب صاحبة الأنف الكبير تعمل إيه؟؟
صاحبة الأنف الكبير بيكون عندها مشكلة في الحجاب لأن أنفها ظاهر واضح في الوجه وفي هذه الحالة ماينفعش معاها إننا نعمل إسبانش للخلف أو طرحة هابطة وماسكة على وجهها فتحاول إنها تلبس طرحة منفوشة شوية أو تضع إكسسوار أو تعمل أكتر من طبقة أو تدخل أكثر من بندانة عشان تخطف العين ولا تجعل التركيز على أنفها.

لو الشفايف كبيرة نعمل إيه؟
نفس الحكاية تحاول تلفت النظر بأي شيء يبعد التركيز عن وجهها وتعمل ماكياج كثير على عينها والطرحة تكون منفوشة وتغير في الربطات والألوان.

نتكلم بالتفصيل شوية عن شكل الربطة المناسبة للبنت في الجامعة؟
ربطة الطرحة لازم تكون بسيطة وخفيفة فممكن تستخدم طرحة أو طرحتين على الأكثر.. يا ريت تحاول تبعد عن الألوان الكثيرة وتكون رقيقة على قد ما تقدر وتبعد تماما عن التول والأورجانزا. وتاخد بالها كويس جدا من لبسها فلو مثلا لابسة حاجة سادة يبقى ممكن الطرحة يكون فيها ألوان، لكن لو لابسة حاجة ملونة أو فيها نقوش يبقى لازم الطرحة تبقى سادة.

وممكن البنت تنوع في شكل ربطة الطرحة بتاعتها وهي رايحة الجامعة فممكن إنها تعمل ربطة إسبانش، بس تاخد بالها إنها تلفها زي الكحكة وتجيبها على قدام، ولو مش عايزة إسبانش يبقى تربطها عادي بطرحة أو طرحتين أو طرحة وبندانة.

عايزين طريقة لفة طرحة تكون روشة؟
1 - نجيب إيشارب واحد نربطه من الخلف طرف طويل وطرف قصير.
2 - الإيشارب الثاني نمسكه بطريقة مائلة ونربطه من الخلف.
3 - كده أصبح عندي أربعة أطراف في الخلف، 2 قصيرين و2 طوال.
4 - بعد كده أجيب واحد من الطرفين الطوال وأطلع بيه عدل وأربطه تاني للخلف.
5 - كده المنظر أو الشكل عدل بميل واللي بعده عدل.
6 - هيكون باقي عندي طرف طويل وطرفين قصيرين.. في هذه الحالة ممكن أجيب الطرف الطويل ألفه على الكحكة وأجيب الثلاثة أطراف على قدام.
7 - لو الأطراف طويلة أعملهم ضفيرة لقدام أو على الخلف.
8 - وممكن فكرة ثانية أجيب الطرف الطويل ألفه على الطرفين القصيرين وأمسكهم في النصف بإكسسوار على كحكة من وراء.
9 - إذن المنظر في النهاية هيكون من قدام عدل ومائل ومن الظهر الأطراف عاملة زي (ذيل الحصان) ومربوطة بإكسسوار.


ربطة الطرحة السواريه تكون عاملة ازاي؟
الأفضل تكون أكثر من طرحة وفي البداية:
1 - أبدأ الأساس بالطرحة الشيفون.
2 - بعدين أضع الطرحة التول عشان بيعطي للبنت شكل فخامة.
3 - وبعدها أضع إكسسوار زي (شريط ستان – سلاسل خرج النجف) أو قطعة من الفستان.
4 - وبعدها أقفل الطرحتين بأكثر من طريقة ممكن الشيفون والتول مع بعض لقدام أو المهم مع بعض كلهم شنيوه عالي لفوق.

عايزين نعرف طريقة ستايل لربطة التول والشيفون؟
1 - أجيب الطرحة الشيفون أربطها على شكل كحكة.
2 - أجيب الطرحة التول وألبسها من الخلف وأعملها كروس على قدام.
3 - أنزل بيهم تاني للخلف وكده هيعطيني شكل البندانة.
4 - بعد كده ألمهم كلهم مع بعض على تحت الشيفون مع التول.


عايزين نعرف طريقة ثانية لربط ثلاث طرح وتكون روشة؟
1 - الطرحة الشيفون أول طبقة.
2 - الطرحة الثانية أجيبها من نصف رأسي بالطول.
3 - الطرحة الثالثة التول أطلع بها كروس لفوق.
4 - أجيب الطرحة الشيفون اللي عملتها من نصف رأسي للوراء.
5 - أرجع تاني وأقفل (كروس) وأنزل كأني أدخلت الشيفون وقفلتها من المنتصف.
الشكل هيظهر عندي كالتالي:
6 - اللون الأول قفلت بيه شعري.
7 - بعدين طلعت بالتول كروس.
8 - وبعدين قفلت من النصف بلون ثاني شيفون.
9 - وكده هيكون شكل الألوان متداخلة. وقفلت المنطقة الأمامية.

بعد كده أعمل إيه؟!
10 - هتكون عندي الأطراف للوراء.

أعمل فيها إيه؟
11 - لو وجهي مليان تكون الأطراف للوراء.
لو وجهي رفيع أجيب الأطراف للأمام.
لو جسمي قصير أرفع الأطراف لفوق.
لو جسمي طويل أنزل بالأطراف لتحت.




فيه بنات كتير بتحب تلبس طرحة واحدة. تربطها ازاي؟
دي ليها أكتر من طريقة:

الطريقة الأولى:
تربطها عادي جدا من الخلف وبعدين تجيب الطرفين على قدام وتربطهم كأنهم زي (الإسكارف أو الكوفية) وتمسكهم بإكسسوار من النصف وممكن تلبس بندانة.


الطريقة التانية:
تربط الطرحة من الخلف وتجيب الأطراف لقدام على شكل حلزوني وتربط أطرافهم بإكسسوار أو شريطة.

طيب والبنات اللي بتحب تلبس أكتر من طرحتين.. الربطة تكون ازاي؟
تعمل طرحة واحدة عدلة وتطلع بواحدة كروس والثانية عدلة أو تلبس بندانة والطرحتين كروس، يعني تضعها بطريقة مائلة وتربطها من الخلف.. والطرحة الثانية تكون عكس الكروس الأول وتربطها بطريقة مائلة من الخلف وممكن تعمل كمان من الأطراف كروس عكس الكروسات الأولى.

البنت المصرية بتحب الربطة الخليجي.. تعملها ازاي؟
1 - تجيب بندانة وتلبسها كويس على رأسها.
2 - تجيب الطرحة وتلفها وتكون من الناحية اليمين قصيرة ومن الناحية الشمال طويلة.
3 - وتربطها بدبوس وتكون (مرحرحة).
4 - بعد كده تجيب الطرف الشمال وتلف الطرحة على الرأس بشكل طرفين.
5 - وبعد كده الناحية القصيرة تتركها على كتفها وتجيبها من الخلف إلى الأمام.


واللفات المغربي والهندي بتكون شكلها ازاي؟
اللفات دي بتكون غير ثابتة ولفها بيكون بطريقة عشوائية وتكون مطابقة لشكل العبايات لأن المغاربة بيحبوا يلبسوا عبايات وتكون خامة الطرحة نفس خامة العباية ويضعوا إكسسوار على الطرح وبيعملوا أكثر من لفة وينفشوها


الربطة المنفوشة أعملها ازاي؟
1 - أجيب طرحة وأربطها من الخلف إسبانش.
2 - الطرحة الثانية نجيبها لقدام.
3 - الطرحة الثالثة تكون منفوشة ونربط طرف منها على فوق والطرف الثاني على الكتف.
4 - الناحية العريضة نرفعها لقدام كأنه شال.

ما الألوان المتناسقة مع بعضها وتكون موضة؟
الفوشية مع الأحمر، والأورانج والبني، والموف مع الأصفر والتركواز.. وأنا في رأيي إن معظم الألوان تتناسب مع بعضها لكن المهم اختيار الدرجة.. يعني درجة معينة مع الأصفر ودرجة معينة مع التركواز وتداخل الألوان يحتاج تركيز ويعتمد على الإحساس الشخصي.

لو مش عاوزة ألبس الطرحة نفس لون البلوزة أعمل إيه؟
لو البلوزة أورانج مثلا ممكن ألبس طرحة زيتي أو بصلي أو أكثر من لون بس يكونوا مناسبين للون البلوزة


ازاي أنسق الإكسسوار مع الطرحة؟
يعني مثلا لو البلوزة صفراء ممكن ألبس طرحة تركواز والإكسسوار يكون تركواز أو تركواز في أصفر. ولو البلوزة زيتي ممكن الطرحة تكون صفراء والإكسسوار أصفر في زيتي، ولو البلوزة بيضاء فكل الألوان تتناسب معها، والإكسسوارات تكون ملونة ومتداخل فيها ألوان كثيرة..

كملي جمالك بمكياجك

علشان نعرف الجديد في موضة الماكياج..




هل الماكياج مرتبط بالطرحة أم بالإكسسوار؟
يوضع الماكياج على أي لون، ولكن من الأفضل أن يكون لون الماكياج مناسب للون الإكسسوار، يعني مثلاً لو البلوزة موف، والإيشارب أصفر، ولابسة إكسسوار تركواز يبقى أحط كحل لونه تركواز..

ولو البلوزة أورانج والطرحة والإكسسوار لونهم بني يبقى أحط على طول كحل بني.

الروج بس هو اللي ممكن لونه يكون زي لون الإكسسوار أو البلوزة.

بس خدي بالك إن الأمر بيختلف تماماً في السواريه، لازم يكون الماكياج متناسق مع لون الطرحة.. يعني مثلاً لو لابسه طرحة لونها نبيتي يكون الماكياج أسود في نبيتي والروج نبيتي.







هل الرموش الصناعية تعتبر موضة الآن؟

احنا رجعنا إلى موضة الخمسينيات، واللي كانت بتسمى موضة "سعاد حسني"، فممكن إننا نضع الرموش الصناعية في النهار مع الآي لاينر، والروج، وتحديد العين باللون الأسود أصبح موضة بالإضافة إلى الماسكرا.

الحواجب الرفيعة أم السميكة هي اللي موضة الآن؟

الحواجب السميكة مع الماسكرا، وتحديد العين بالكحل أصبح موضة.

ازاي أضع ماكياج، وأظهر أني بدون ماكياج؟

بإنك تحطي ألوان خفيفة زي (البيج)؛ لأنها بتدّي إحساس بالطبيعة أكتر.

أيهما يستوعب ماكياج أكتر: صاحبة البشرة البيضاء أم الخمرية؟

البشرة الخمرية تستوعب ماكياج كتير، وأنا عن نفسي مش بحب أحط ماكياج كتير على الوجه الأبيض؛ لأنه بطبيعته بيكون بسيط، وفيه ألوان طبيعية، ومش بيحتاج إلا ألوان بسيطة زي ألوان "البيجات" فوق العين بجانب الروج.

ازاي أداري عيوب الوجه بالماكياج؟

بالنسبة للأنف الكبيرة أو أي حاجة بارزة وضخمة..
يبقى أضع كريم أساس غامق على هذه المنطقة، وعلى بقية الوجه لون فاتح؛ عشان يعطي مساحة لون واحد، وممكن عند رسمة الشفايف تضع لون التحديد لفوق وتكبّر الشفايف شوية عشان تغطي شوية من ضخامة الأنف.

وبالنسبة للشفايف الكبيرة..
يبقى أحاول أعوض في منطقة العين، وأضع فيها ماكياج كثير؛ عشان التركيز يكون على العين أكثر، وأصغّر طريقة التحديد من داخل الشفايف، ولا تضع "ملمع الشفايف"؛ لأنه يعطي سُمك للشفايف، لكن لو الشفايف صغيرة تستخدم قلم تحديد داخل منطقة الشفايف، وتضع "ملمع الشفايف"؛ عشان يعرّض الشفايف.



ازاي أضع الكحل في العين الضيقة؟

أضع الكحل من الخارج وأسحبه كله للداخل، لكن ممكن تضع ألوان كحل زي البيج والأخضر والتركواز من الداخل، ونحاول نبعد عن اللون الأسود؛ لأنه حيصغّر العين..

بالنسبة للعين الواسعة؟

تحاول تضع الكحل من الداخل خاصة في العين الجاحظة، ولا تضع ألوانا من تحت الجفن، وتضع ألوانا في المنطقة المتحركة من العين.

وازاي أثقّل الحواجب؟

(بالآي شادو) الخاص بالحواجب، واسمه (إيبرو)، وبالفرشة الخاصة به واسمها (إنجل براش)، وتبتعد تماماً عن استخدام قلم الكحل لثقل الحاجب؛ لأنه بيساعد على تقصّفها، لكن قلم الكحل يستخدم في حالة الحواجب الخفيفة قوي، وعلى فكرة (آي شادو) الحواجب فيه ألوان كثيرة زي البني الفاتح والغامق والأسود.

هل هناك بديل لكريم الأساس؟

أنصح أثناء النهار بوضع عازل للشمس ملون لكن في الليل أضع كريم أساس بأنواعه المختلفة والمناسبة للبشرة؛ لأنه يعطي لونا موحدا للبشرة، وأستطيع أن أضع أي لون من الكحل والروج بسهولة وجمال.

الروج الأحمر رجع موضة تاني، ومعظم البنات لا تحب الأحمر، تعمل إيه وإيه درجة الأحمر المناسبة؟

الروج الأحمر يناسب الجميع، طالما اللي تضعه متقبلاه نفسيّاً، وليس ضروريّاً استعماله مع ألوان الملابس بالعكس؛ فأعتقد إن كل ما كانت الحاجة متماشية كلها مع بعض كانت أفضل، فمثلاً لو استعملت البنت الروج الأحمر يبقى تبعد عن أي آي شادو بألوان جريئة زي الأحمر أو الأزرق أو الموف، ويكفي استعمال الكحل أو الآي لاينر الأسود والماسكرا، وممكن آي شادو بيج خفيف.



وازاي أحافظ على درجة الروج أطول فترة ممكنة؟

نستعمل محدد الشفاه الجاف، ونغطي به الشفاه بالكامل، وهذا يعمل على تثبيت الروج ولا يتغير، وإذا كان لون الشفاه الأصلي غامقا فيمكن وضع الفوندشين الفاتح قبل الروج.

ازاي أحافظ على الحواجب من السقوط؟

1- لا نستعمل قلم الحواجب؛ لأنه يساعد على سقوط الشعر في هذه المنطقة.
2- لا نستعمل موس؛ لإزالة الشعر.
3- لا نجري وراء الموضة، ونرسم حاجبا رفيعا؛ لأن الموضة بتتغير والآن الحواجب الثقيلة موضة.
4- ونستعين بزيوت طبيعية قبل النوم لدهن الحاجب، وكمان الشعر؛ لمنع سقوطه، وهو زيت مستخلص من شعر الخيل.

الماسكرا أحيانا بتكون غليظة هل معناه أنها أصبحت منتهية، ولا ممكن يكون لها حل؟
أولا: نتعرف على صلاحية الماسكرا من رائحتها، وطبعاً هنا يكون استخدامها ضارّا جدّاً، وتسبب مشاكل كثيرة، لكن عندما تكون غليظة ممكن وضع نقطة ماء أو نقطة كريم سائل؛ لكي تصبح سائلة، وهذا أفضل من وضع زيت من أي نوع؛ لأنه ممكن أن يضر العين.

إيه هي أحدث الألوان في الماكياج؟

أكثر لون بدأ يظهر، وموجود في أغلب الماركات هو اللون البني المائل إلى الروز، وهذا اللون مناسب جدّاً لبشرتنا الخمرية، خاصة أنه موجود في أحمر الشفاه، وفي الآي شادو بجانب طبعاً ألوان البيج وهي ألوان جميلة ولا تتغير موضتها، وتبدو وكأن البنت بدون ماكياج.

ازاي أضع مانيكير الأظافر بطريقة صحيحة؟

1 - قصي أظافرك حسب الرغبة والطول المناسب لكِ.
2 - استعملي المبرد الخشبي؛ لأن المعدن يشقق الظافر ويضعفه.
3 - انقعي الأظفر في ماء دافئ عليه شامبو لمدة خمس دقائق.
4 - أزيلي الجلد الزائد حول الظافر عن طريقة قطعة قطن صغيرة.
5 - قصيه بالقصافة الخاصة بالجلد.
6 - ضعي المانيكير الشفاف لحماية الأظافر من التلوث.
7 - ضعي اللون المرغوب فيه، ويترك عشر دقائق.
8 - ثم ضعي طبقة مانيكير شفاف لحماية اللون من التقشر.
9 - بعد كده حسب الرغبة في رسم الأظافر بالقلوب والنجوم حسب الرغبة.

نصيحة أخيرة تقدميها لكل البنات؟

كل بنت تحاول تكون (بنوتة) في كل شيء: في لبسها.. ماكياجها.. طريقة كلامها...



وبكده اكون خلصت كلامي علي المكياج

مواضيع أخرى قد تهمك :

هل أعجبك الموضوع ..؟ هل استفدت منه ..؟ اذن اشترك فورا معنا وضع ايميلك بالاسفل ليصلك جديدنا .

اشترك فى خلاصات الار اس اس